ንዓመት ብሳህሊ ትኸልላ

መዝሙር ዳዊት 65፡ ናይ ዳዊት ናይ ምስጋና መዝሙር እያ። እዚ መዝሙር ግደ ኣምላኽን ግደ ሰብን ብንጹር ፈልዩ  ዝዛረብ መዝሙር እዩ። ኣብተን ቀዳሞት ክልተን ፈረቃን ጥቕስታት፡ ግደ ሰብ እንታይ ከም ዝኾነ ይዛረብ። ንሱ ድማ ንኣምላኽ ዝኸውን ምስጋና፡ ተወፋይነት ጸሎትን ምእማንን ኸውን ከሎ፡ ካብ ኡ ንታሕቲ ዘሎ ክፍሊ ናይቲ ምዕራፍ ክሳዕ መወዳእታ ግና ኣምላኽ ዝገብሮ ነገር ጥራይ እዩ ዝዛረብ።

እግዝኣብሄር ንዓመት ብሳህሉ ይኽልላ፡ ብሕያውነቱ ይሽፍና፡ ካብ  ምሕረቱ ዝተላዕለ ካብ ዓመት ናብ ዓመት ንሳገር። ግና እዚ ጥራይ'ውን ኣይኰነን። ከምቲ ካብ ጥቕሲ 4 ዘሎ፡ እግዝïኣብሄር ናብ ማሕደሩ ኣቕሪቡና ብበረኸት ቤቱ ድማ ኣጽጊቡና እዩ። ካብ ክፉእ ዘበለ መዕቆቢ ኰይኑና፡ ንብኹልና ኸኣ ባሪኹና እዩ።

ኣብዚዝውዳእ ዘሎ ዓመት 2009፡ ኣምላኽና ብሓቂ ምሳና እዩ ነይሩ፡ ናይ ምድሓን ኢዱ ድማ ርኢና ኢና። ስለዚ ስለቲ ዝገብረልና ኹሉ ሰናይ ነገር፡ ናብ ኣምላኽና ብምስጋና ክንቀርብ ይግብኣና እዩ። ከም ሓሳብ ሰይጣን እንተዝውን ቀደም ምጠፋእና፡ ግና እቲ ኹሉ ዝኽእል ኣምላኘና ኣብ ቅዱስ ስሙ ኣዕቍብናስ፡ ኣብዚ በጺሕና ኣሎና።

ኣብዚ ኣብ  ቅድሜና ዘሎ ዓመትከ ራእይና እንታይ ኽውን እዩ። እንታይ ንርኢ ኣሎና? ከምቲ ኣምላኽ ዝርእዮዶ ወይስ ብስጋ ንጥምት ኣለና? እግዚኣብሄር ጽቡቕ ረኣኻ ክብለናን ነቲ ዝበለና ቃሉ ንኽንፍጽምን፡ ከምቲ ንሱ ዝረኣዮ ክንርኢ ይግብኣና። ንሕና ነቲ ዘይርኤ እምበር ነቲ ዝር ኤ ኣይንጥምትን ኢና፡ ምኽንያቱ፡ ብእምነት እምበር ብምርኣይ ስለ ዘይንመላለስ (2 ቈረ 4፡18, 5፡6)። ከምቲ ኣብ ዘጽ 15፡9 ተጻሒፉ ዘሎ፡ ሓሳብ ሰይጣን፡ ምርኮ ክመቕል ሴፍ መሊሑ ድማ ጥፍእ እዩ፡ እግዚኣብሄር ግና ነቲ ዝተበጀዋ ህዝቢ ብምሕረቱን ብሓይሉን ናብ ቅዱስ ማሕደሩን ይመርሖ ኣሎ።

እምበኣርከስ፡ ከምቲ ዝወጽእ ዘሎ ዓመት፡ ነዚ ንኣትዎ ዘሎና ሓድሽ ዓመት ድማ ብምሕረት ተኣሚንና ክንኣትዎ ይግብ ኣና። እቲ ዘይስገር ዘስግር ኣምላኽ፡ ነዚ ሓድሽ ዓመት ድማ ከም ዘሳግረና ኽንኣምኖ ይግባእ።

ኣብዚ 2010 ዓመት ዉን ፡ ከም ጸለይቲ፡ ውልቃዉን ሓባራዉን ራእይ ክህልወና ይግባእ። እዚ ዓመት'ዚ ነቲ ደኺሙ ዝጸንሐ ናይ ውልቃዊን ሓባራዊን ናይ ጸሎት ጊዜ እንሕድሰሉ ኽኸነልና ይግባእ። እግዝኣብሄር ኣብዚ 2010 ዓመት'ዚ፡ ምንቕቓሕ ክሰደልና፡ ሓዊ መንፈስ ቅዱስ ከውርደልና እንተደኣ ኾይኑ፡ ዝፈረሰ መሰውኢና ንሓድስ (1 ነገ 18፡21-40)። ኤልያስ፡ ነቶም ናብ ክልተ ዝሕንክሱ ዝነበሩ ሰባት፡ እግዚኣብሄር እንተኾይኑ ኣምላኽ  ደድሕሪኡ  ስዓቡ፡ በዓል እንተኾይኑ ድማ ንዕኡ ስዓቡ፡ ኢሉ ናይ እግዝኣብሄር ኣምላኽነት  ከም  ዘርኣዮም፡ ንሕና ድማ ሎሚ፡ ከምቲ ኣብ መዝ 115፡2 'ንምንታይ ደኣ ኣህዛብ ኣበይ ኣሎ ኣምላኾም ዝብሉና' ተባሂሉ ተጻሒፉ ዘሎ፡ ናይ ጸሎትና መሰውኢ እንተ ሓደስናዮ፡ 'ኣምላኽናስ ኣብ ሰማያት ኣሎ ዝደለዮ ኹሉ ይገብር እዩ' ቁ3፡ ኢልና ክንምልስ፡ ኣይክንሓፍርን ኢና። በዚ ድማ፡ ናይ ነፍሲ ወከፍ ሰብ ናይ ውልቂ ናይ ጸሎት ህይወት እንተተሓዲሱ፡ ከም ኣካል ክርስቶስ ኵሉ ተሓዲሱ ኣሎ ማለት እዩ።

ስለዚ ክብሪ እግዚኣብሄር ንኽግለጽ፡ ስጋ ኵሉ ድማ ምእንቲ ክርእዮስ ንሕና፡ ሎሚ፡ ጐደና እግዝኣብሄር ከነቕንዕ መገዲ ነዳሉ ይግብኣና እዩ። በዚ ድማ ነዚ ወርሒ እዚ፡ ሓደ ኣርእስቲ ክንወስድ ኢና። 'ህዝብኻ ብኣኻ ክሕጐስሲ መሊስካዶ ህይወት ኣይክትህበናን (ኣይከተነቅቕሓናን) ኢኻ? " እግዚኣብሄር ጸጋኻ ኣርእየና ምድሓንካ'ውን ሃበና' መዝ 85፡ 6-7።

እግዚኣብሄር ሓድሽ ንፋስ ናይ መንፈስ ቅዱስ ከንፍስ እሞ ናይ ምንቕቕሕ ዓመት ኽኰነልና ንጸሊ። ምንቕቕሕ ማለት ን ኣምላኽ ብሓድሽ መገዲ ክንደልዮን ክንጸምኦን፡ ሓጢኣትናን ድንዛዘናን ከነወግድ፡ ዝኣበስናዮ ኽንናዘዝን ፡ ዝዓመጽናዮ ክንመልስ፡ ኵሉ ሳዕ ብቃሉ ዝተሓደሰ ኣእምሮን ሓሳብን ክንሕዝ፡ ዕዮ ኣምላኽ ክንገብር ድሉዋት ኽንከውን፡ ማለት እዩ። 'እግዚኣብሄር ጽባሕ ኣብ ማእከልኩም ዘገርም ነገር ክገብር እዩ እሞ ተቀደሱ' እያ 3፡5።